හිරු රහසේ කියාදුන්නු ආදරය ද මේ....

“ආදරය” හරියටම නිර්වචනයක් දෙන්න නොහැකි හැඟීමක්.ඒත් අපි කාගේ කාගේත් හදවතට දැනෙන හැඟීමක්.වයස, කාලය තරාතිරම වෙනසක් නැතිව දැනෙන හැඟීමක්. ඒ ආදරණිය හැඟීම ජිවිතයට දැනුනම මිනිස්සු ආදරය ඇතුලේ අතරමං වෙනවා. ජීවිතයේ අවධීන් දිනයකට සමාරුප කරන්න හැකිනම් හැන්දෑව කියන්නේ තුරුණු විය ඉක්ම ගිය කාලයයි.  “ගිමන් හරින දියඹ, සුසුම් හෙලන වෙරළ ඉම” ජිවිතයේ තුරුණු විය ඉක්ම ගිය බව පසක් කරයි.හිරු බැස යමින් සිටියි.බැස යන හිරු රහසින් සඳට නැගෙන්නට ආරධනා කරයි. ආදරය ළඟ හැමදාම සාහිත්‍ය නැවතුනේ සඳ ළඟ වගේම සඳ ආදරයෙන් අහස පුරාම රටා මවනවා.හිත පුරාම ආදරණිය සිතුවිලි සෙමින් සෙමින් මැවෙනවා. ඒ කොයි තරම්ද යත් දිනෙන් දින සඳ කලාවන් පුරනවා වගෙයි අඩැසි සඳ රටා මවන්නේ එලිය දී පායන්න ආකසේට.ඒ වගේම ආදරයත් සිත තුල මොහොතින් මොහොත දැනෙනවා.

හින අපේක්ෂා හැමකෙනේක්ගේම සිත් තුල ආදරය එක්ක බැදිලා තියෙනවා.තුරුණු වියේ ආදරණීය හැඟීම් එක්ක අපි කවුරුත් හිතින් රූප මවනවා නෙතින් දකින්නට. සිතින් හැමදාම ප්‍රර්ථනා කරපු,නෙතින් දකින්න ප්‍රිය කරපු, හදවතට දැනුණ ආදරය ළග කෙනෙක්ට මියදෙන්නත් පුළුවන්.බැහැල යන හිරු රහසේම කිව්වේ මේ දැනෙන ආදරය ගැනමද.හිරු බැස ගියාට හිතට දැනෙන්නේ ආදරයයි.ඒත් ජිවිතයෙන් පරිණත හිත ළඟ මේ දැනෙන්නෙත් මුළු හිතින්ම ප්‍රර්ථනා කරපු ඒ ආදරයමයි.ඇත්තටම ආදරයට වයසක් මොකටද? හදවතට දැනෙනවානම්. ඒ ආදරය ළඟ ජිවිතේ තියෙනවා නම්. හිරු කියන්න ඇත්තේ රහසින් ඒකයි. හිරු කවුරුවත් නොවෙයි වයසින් විතරක්ම තුරුණු විය ඉක්මුණු හිතමයි.

“නිල් කටරොළු නිල” නිකම්ම නිකම් කටරොළු මලක්ම නෙමෙයි නිල් පාටින් නැහැහුන මුදු සුවදින් නැහැවුන  කටරොළු මලක්.ඒවගේම ආදරයක් ළඟ  ආදරය විදින්න පෙම්වතෙකුගේ සිතෙහි තියෙන බලාපොරොත්තුවක්. මේ දැනෙන්නේ ඒ ආදරයද? සිතින් විතරක්ම වින්ද ඒ ආදරයද? නුඹ රහසින් කියාදුන්නේ ඒ ආදරයද? මට හිතෙන්නේ තවමත් ආදරය ගැන සිතින්ම විමසනවා කියලයි.

හිරු රහසින් සඳට ඇරයුම් කළාම සඳ රටා මවනවා ආනන්දයෙන්. ඒවගේමයි නුඹත් රහසින් කිව්වා.රහසේම මට කියලා දුන්නා. ඇත්තටම ඒ හැමදේම මේ දැනෙන ආදරයද? ගිමන් හරින මේ ජ්විතේ රහසින් ඇරයුම් කරපු රහසින් කියාදුන්නේ හැඟීම ළඟ නවතින්න හිතෙනවා, ඒත් ආදරයට නිර්වචනයක් දෙන්න බෑ හදවතටම දැනෙන මේ හැඟීම ආදරයද?

ගිමන් හරින දියඹ දිගේ
සුසුම් හෙලන වෙරළ ඉමේ
බැස යන හිරු අඩැසි සඳට රහස් කියනවා...
සඳ ආදරයෙන් අහස පුරා ර‍ටා මවනවා...

හිත් දැහැනේ වෙලි තිබුණු
නෙත් දෑලේ ගලා හැලුණු
මියැදෙන්නට බලා ඉඳපු ආදරයද මේ...
හිරු රහසේ කියා දුන්නු ආදරයද මේ...

නිල් කටරොළු නිල නැහැවුණු
මල් බර මුදු සුව ‍රැඳවුණු
තොල් පෙති කල් හඬගාලන ආදරයද මේ...
නුඹ රහසේ කියාදුන්නු ආදරයද මේ…

පද රචනය -ජානක සිරිවර්ධන
සංගීතය - අරුණ ගුණවර්ධන
ගායනය - පණ්ඩිත් ඩබ්ලිව්.ඩි. අමරදේව