තරු පිරී මේ අහස ලස්සනයි

සේපාලිකා මල් සුවඳ පැතිරිලා

සුරකුමරියන් ඇවිත්

කෝ කොහෙද නුඹ විමසනා....

තනියෙනුත් ලස්සනට සිනා සී

උකුලේ නිදනා පුතු දැක බලා

කිමැයි මේ විමසුවෙමි

විස්මයෙන් මම හිනැහිලා....

වසඟ කර ලොකයක්

කතා කරනා ඇස් ආදරේ පුරවලා

මේ තරම් ලස්සනට හිනැහෙන්නේ

ඔය සුරලෝකයයි සිහිවෙලා

අම්මාව සොයාගෙන ඇවිත්

මට ලැබුණු ලස්සනම තිලිණය වෙලා

මේ දැනුත් හිනැහෙන්නේ අම්මා එක්ක

සෙමෙන් කීවෙමි මම ත් හිනැහිලා

😘😘😘😘

 

සීතල පවන ඇවිත් සවනට

මුමුණනවා රහසක් හිමිහිට

උදා වූ මේ අරුණැල්ල ලෝකයට

ගෙනාවේ ලස්සන දවසක් නුඹට

 

කඳු හෙල් පසු කරන ගංගාව

දිනෙක සයුරක් සොයා යන්නා සේම

ජීවිතයේ හැම අභියෝග පසුකර

හිමි හිමින් ගෙනයාවි නුඹ පෙරට

 

දුක සතුට වෙනසක් නැතිව

ගෙවෙනා දවසක වෙහෙස නිමාව

හද වෙලා ගත් සතුටක් කැටිව

හිනාවෙනු මැන මුව පිරී සිනාව

 

බිඳුනු කඩතොලු පිරුණ හදවත්

දිනෙන් දිනයට සුව පිරේවා...

සතුට සැනසුම හද පුරෝගත්

සොඳුරු මිනිසුන් මුණ ගැසේවා....

අපට නැතිවත් අනුන් හිනැහෙන

සතුට ඉවසන පුරුදු වැඩේවා....

හිනාවෙන් පිරි මුහුණකට

සිනා ගෙනෙනා අය මුණ ගැසේවා....

ජීවිතේ මහ විසල් බර මත

හදේ සැනසුම ළඟ රැඳේවා....

නපුරු දුදනන් ගෙනෙන හිරිහැර 

මෙතින් සිත් තුල සුව වැඩේවා.... 

 

වර්ණය සුවඳ කිමැක්දැයි
නොදන්නෙමි
දිය බිඳෙන් බිඳ එකතු කර
වෙලාවට පොහොර යොදා
ආදරෙන් පත්‍ර අතගා සෑදු
ගසෙහි
වස්සානයට පිපෙන
පොහොට්ටුවක් දකිමි
නමුත්
ඒ මල කුමක්දැයි නොදන්නෙමි
ආදරෙන් ආදරේ පිපිනා තරම්
ලස්සනම ලස්සන මලක්
පිපෙනා තුරාවට
බලාපොරොත්තුවක
ආදරෙන් ජීවිතය විඳිමි...

💕💖😘💗💖

 

සුදුපාට හිස් කඩදාසියක් මත

පැන්සලෙන් කුරුටු ගා

මතුකරගත් සිත්තමක් නම්

ජීවිතය

ඉතින් ඒ සිත්තමේ තියෙන

ලස්සනම පාට අළුපාට

දුක සතුට හිමි අහිමි හැමදේම

එකින් එක ගලපමින්

සීරුවට වෙන් කළා නම්

ඒ ජීවිතය

ඉතින් ඒ බෙදීමේ තියෙන

ලස්සනම දේ හිනාවුණ මතක

එක දිගට මහ අනෝරා

කඩාගෙන වැටෙද්දී ....

තෙමෙන්නට පුළුවන් තරම්

තෙමි අහවර වෙද්දි....

ගොඩවෙලා වහල යට

මොහොතකට හුස්ම ගද්දී....

අපි වගෙමයි උණුත් ජීවිතය

ළඟ ජීවිතය ගෙවද්දී....

 

 

මහ හුඟක් බර දැනෙන
හැඟුම් එකිනෙක මුහුකොට
සුළඟකට කියන්නෙමි
රැගෙන.... පාවෙන්න
නොපෙනෙනා තරම් දුරකට
ආයෙමත් එන අතරමග
සෙනෙහසින් අත් අල්ලාගෙන
මිතුරන් පමණක්ම
එක්කාසු කරගෙන එන්න
එවිට
අපි හිනැහේවී......නිසැකවම
අදටත් වඩා ලස්සනට
හිත නිදහසේ සුවයෙන්ම